॥नोनी बाबू एक हे, झन कर संगी भेद ।
रूढ़ीवाद बिचार ला, लउहा तैंहा खेद ।।
लउहा तैंहा खेद, नवा उजियारा आही।
पढ़ही बेटी एक, दुई घर सिक्छा लाही ।।
मान मिलन के गोठ, भ्रूणहत्या कर काबू ।
भेद छोड़ के भेज, पढ़े बर नोनी बाबू।। ✨
🌿🌿🌿🌿🌿🌿🌿🌿🌿🌿🌿
।
पुस्तक कापी लानदे, बिसादे अउ सिलेट !
बरतन चउका झन करा, पढ़ाई ल झन मेट !!
पढ़ाई ल झन मेट, ज्ञान मान अधिकार दे!
बेटी बने पढ़ाव, चरित संसकार दे !!
आही सिक्छा काम, दरद दुख देही दस्तक !
मनुस छोड़थे संग, फेर नइछोड़य पुस्तक !!✨
-
बेटी पढ़के बाँटही, गांव गांव मा ज्ञान !
परकेधन झन मान जी, इही देस के जान !!
इही देस के जान, पढ़लिख जुग सिरजाही !
रुकही अत्याचार, कुकर्मी दूर हटाही !!
कहे मलरिहा रोज, लान दे बसता पेटी !
अबतो जाग समाज, धरादे पुस्तक बेटी !!❄
बहू कहाॅंले लानबो, परते हवय अकाल ।
बेटा बेटा सब गुनय, इही जगत के हाल ।।
इही जगत के हाल, कोख भितरी मरवाथे ।
करले बने बिचार, दुवारी कोन सजाथे।।
कहत मलरिहा गोठ , मती मा तोर बसाले ।
छोड़ दिही संसार, लानबो बहू कहाँले ।।❄
-
नोनी ला झन मान तैं, ए जिनगी के बोझ।
टूरा दरुहा टेड़गा, कोनो कोनो सोझ ।।
कोनो कोनो सोझ, जेन सरवन बन पाथे।
दिनभर टेड़े आॅंख , फोन मा गेम चलाथे ।।
सरत रहै कइ काम, कान मा खोचे पोनी।
दाई बाबू के गोठ, मानथे बेटी नोनी।।
॥॥✍️ मिलन मलरिहा
मल्हार बिलासपुर
कोई टिप्पणी नहीं:
एक टिप्पणी भेजें