मिलन मलरिहा

बगल मा पौवा खोचे, कुकरी ला अरझाये

लेड़ेड़ मेडेड़ रेंगे, कहत वो होली हे...

दरुहा सही हे जन, जमाना मा कछु होए

पइसा पाये वोट दे, कहत वो होली हे...

जनता हे मस्त सबो, भांग वांग लेके सोए

मोदी घर सिंधिया हे, कहत वो होली हे...

जनता ला बेवकूफ, नेतामन बनादिस

बहुमत तोड़ नाचे, कहत वो होली हे....

मिलन मलरिहा

मल्हार बिलासपुर छत्तीसगढ़

*जनकवि लक्ष्मण मस्तुरिया*
#_प्रथम_पुण्यतिथि _ सादर नमन
।
तूमा नार बखरी मा रोवत, पाके चार होगे करिया जी ।
गोहरावत छंईहा भुंईया, तै कहाँ गये मस्तुरिया जी ।

परें डरें अऊ गिरे हपटे मनखे ब ढेखरा कोन गड़ाही।
सुमित के सरग निसैनी गढ़के सबला ला कोन रेंगाही।
कोन बताही अरपा-पैरी, गंगा ले सुग्घर फरिया जी.......

परबुधिया टेड़गा मनखे ला, कोन फटकार लगाही
छँईहा भुंईया छोड़ जवईया के फेर कोन चेत जगाही
छत्तीसगढ़िया झिन जाबे, खेत ल छोड़के परिया जी......

डोंगरी मँ मऊँहा छाय रहय जब आवय मांघ फागुनवा
खेत-खार जंगल सब झुमरय, मन हिलोर डारै किसनवां
बिन सुर धार कइसे पलही , सुख्खा होगे तरिया जी........
।
मिलन मलरिहा
मल्हार ,मस्तुरी बिलासपुर छग