छत्तीसगढ़ मा जब जब मंचीय कला प्रस्तुति के गोठ होथे। तब तब भरथरी के विख्यात गायिका सुरुज बाई खांडे, पंथी के अंतराष्ट्रीय ख्यातिलब्ध कलाकार देवदास बंजारे। पंडवानी विधा के विख्यात गायिका पद्म विभूषण तीजन बाई, ऋतु वर्मा अउ पंडवानी विधा के पहली पुरुष वर्ग के प्रसिद्ध कलाकार झाडूराम देवांगन जइसे पुरोधा मनके सुरता तुरते मन मा आ जथे। अभी के समय के लोग-लइका मन पंडवानी गायिका तीजन बाई , पद्मश्री उषा बारले, सम्प्रिया पूजा निषाद, शांति बाई चेलक ल ही जान पाथे। जइसे रुख मा हर ढेखरा, पाना ल पंदोली देवइया थॅंघाली रहिथे अउ पूरा रुख ल बोहईया थाॅंघा अउ थाॅंघा ल बोहईया जरी रथे।
ठीक अइसने पंदोली के बुता कला-जगत पुरखौती गुरु के बताये रसता रहिथे। जेनला देखके, ओकरे जइसे बने के चाह मन मा धरके नवा कलाकार अपन मेहनत ले बड़े नामी कलाकार बनथे।
1960 सदी के बीतत बेरा म मंच के विशिष्ट पहचान पंडवानी के प्रथम यशस्वी पुरुष कलाकार स्व. झाडूराम देवांगन अउ पंथी विधा के नामी कलाकार देवदास बंजारे, प्रथम चर्चित पंडवानी गायिका श्रीमती लक्ष्मीबाई बंजारे रहिन। ये तीनों चर्चित नाम दुर्ग जिला के छोटे छोटे गाॅंव के रहइया आय। ओ बखत एमन दुर्ग जिला के सान कहलावय। आज छत्तीसगढ़ के गौरव हे। दुर्ग जिला साहित्यिक, कलात्मिक जिला के नाम ले आज तक गौरवान्वित हे। नाचा, गम्मत, रहस, गीत-गोविन्द के पार्टी, चंदैनी गोंदा, कारी, देवार ढेरा, सोनहा बिहान, लोरिक चंदा, लोकरंजनी जइसे किसम - किसम के कला मंच अउ कलाकार ल दुर्ग जिला के पावन माटी हा जनम देय हे।
दुर्ग के झाडूराम देवांगन के प्रस्तुति देखके पूनाराम निषाद पंडवानी विधा म आघू बढ़िन। ठीक वइसने 60 वर्ष के लक्ष्मीबाई के प्रभाव महिला कलाकार मन ला पंडवानी कला के प्रति प्रेरित करिस। ओ बखत लक्ष्मीबाई के नाम चारों डहर गुॅंजेमान रहिस तब तीजन बाई हर मात्र आठ-नौ बछर के रहिन होही। अपन कइठन साक्षात्कार म पद्मविभूषण तीजन बाई हर लक्ष्मीबाई ले मोला प्रेरणा मिलिस कहिके ये बात ल स्वीकार करे हे। फेर इतिहास के ओ बेरा गवाही देवत हे कि लक्ष्मीबाई मंच के पहली पंडवानी गायिका नोहॅंय वो प्रथम महिला पंडवानी गायिका आय। ओकर ले पहली सुखिया बाई कापालिक शैली (खड़ा होके गायन) मा पंडवानी गावत रहिच। सुखिया बाई रायपुर के मुनगी गाॅंव के निवासी रहिन। सुखिया बाई पुरुष मनके वेशभूषा म प्रस्तुति देवय। काबर कि ओ समय पंडवानी के विख्यात कलाकार रावन झीपन गाॅंव वाले ममा-भाॅंचा के जोड़ी बड़ प्रसिद्ध रहय। सुखिया बाई ल लगिस होही कि पंडवानी तो महाभारत के कथा म धर्म -अधर्म, राज-पाठ,लड़ाई-झगरा के किस्सा आय एकरे खातिर एहा वीरता, ओज वाणी ले सजे रहिथे। इही बात ल धरके सुखिया बाई पुरुष सवाॅंगा पहिरके, खुला बदन मंच म चढ़य। सुखियाबाई पुरुष वेषभूषा के खातिर प्रथम महिला पंडवानी गायिका के रुप म जन मानस मा चिनहारित नइ हो पाइस। सुखिया बाई ल जनता पुरुष गायक के रुप म देखिस। प्रथम महिला पंडवानी गायिका के दरजा अउ पंडवानी के पुरखौतिन दाई के गौरव श्रीमती लक्ष्मीबाई बंजारे के नाम हे।
श्रीमती लक्ष्मीबाई बंजारे ल पंडवानी के पुरखिन दाई एकर बर कहिथे काबर कि ओहर पहली पंडवानी गायिका रहिन जेन हर महिला वेषभूषा मा पंडवानी के प्रस्तुति मंच म करिन। पहली कापालिक शैली म शुरुआत करिस बाद मा वेदमती शैली के साधक बनगे।
श्रीमती लक्ष्मीबाई बंजारे के गुरु उॅंकर खुदके पिता दयाराम बंजारे रहिन। दयाराम बंजारे के ग्यारा जन बेटा अउ दूझन नोनी म मात्र लक्ष्मीबाई ही बाच पाइस।
सन 1944 बछर के देवारी परब म लक्ष्मी पूजा के दिन लक्ष्मी बाई हा जनम लिस एकरे खातिर उॅंकर नाॅंव लक्ष्मी के नाम मा रखिन। लक्ष्मी तो नाॅंव म रहिन फेर जिनगी हा लक्ष्मी के आभाव म बीतिन। माता फुलकुंवर हा अपन एकलौतिन बेटी लक्ष्मी ल बड़ मया दुलार देइन।
चौथी कक्षा ले लक्ष्मी बाई महाभारत, रमायण के परायण करके प्रमुख कथासार के मूल सूत्र ल टमर डर रहिस। 18 दिन तक लगातार पंडवानी गायकी के अनुभव के संग रमायण गायन म घलो बचपन ले कुशल कलात्मक गुण ल धर डरे रहिच। लक्ष्मीबाई श्रेष्ठ कलाकार के संगेसंग पहली साक्षर महिला कलाकार घलो आय। लगभग पंदरा बछर के उमर ले मंच मा लक्ष्मीबाई पंडवानी गायन करत हे।
पिता मशाल नाच के प्रख्यात कलाकार रहिच। जेन हर खड़े साज म चिकारा बजावय। बेटी लक्ष्मीबाई बंजारे घलो शुरुआत कापालिक शैली ले करिन बाद मा वेदमती शैली के साधक बनिस। लक्ष्मीबाई के बाद रितु वर्मा वेदमती शैली म आघू बढ़िन। आनिबानी के शैली, टोटका, लटक झटक हा नही बलकी कलाकार अपन साधना के दम मा आगू बढ़थे। लक्ष्मीबाई ल घलो अपन साधना के दम म मंजिल मिलिस। ओहर आकाशवाणी के प्रथम पंडवानी गायिका आय। 1972 ले लक्ष्मीबाई आकाशवाणी म प्रस्तुति देवत आत हे। श्रीमती लक्ष्मीबाई बंजारे हा मोतीबाग, महाराष्ट्र मंडल, आदिवासी लोक कला परिषद् के मंच अउ उदियाचल के आयोजन म पंडवानी के प्रस्तुति देके जन-जनार्दन मनला मंत्रमुग्ध कर अमिट छाप छोड़िस।
प्रसिद्ध गायक झाडूराम देवांगन ल लक्ष्मीबाई हा ममा कहय काबर कि झाडुराम के गाॅंव बासिंग (दुर्ग) लक्ष्मीबाई के ननिहाल गाॅंव आय। लक्ष्मीबाई ल पिता के संगे संग ममा झाडूराम देवांगन ले घलो मार्गदर्शन मिलत रहय।
गिरौदपुरी धाम के मंच मा समाज हर लक्ष्मीबाई ल स्वर्ण पदक ले सम्मानित करिन। सरकार ओला अनचिनहार करिस। लक्ष्मीबाई अपन उपेक्षा ल देख हाॅंसत एकठन टिप्पणी करय:-
"रंग रुप म राजा मोहे, चटक मटक दारी,
भाव भजन म साधू मोहे, पंडित करौं बिचारी।"
वो कहत रहय - सबके अपन अपन युग होथे, जइसे बेरा साॅंझ होके चले जाते, फेर काम रह जाथे। काम के कीमत सदा होथे। परचार करे ले थोरकन हलचल कलाकार मचा सकथे। परचार ले भला सच्चा सम्मान कहाॅं मिलही।
लक्ष्मीबाई सत्ता के रवईया सोचके एकठन गीत अपन हिरदय के झलकत दरद ले गावय:-
" सोना तो बाजय नहीं, कांच पीतल झन्नाय।
साधू तो बोलते नहीं, मूरख रहे चिल्लाय।।
धरे हॅंव ध्यान तुम्हारा मैं रघुवर"...........
तइहा बेरा मंच गायन गीत-गोविंद क्षेत्र म नारी जात ल समाजिक निंदा के सामना करे ल परय। गवईया-बजईया ल समाज हर बहेलिया, चटरहा के उपमा देवय। पंडवानी गायन ले जुड़े के बाद लक्ष्मीबाई के बिहाव दाई-ददा बर चिंता के विषय बनगे रहिच। फेर समय के का ओकर मेरा सबके ईलाज हे। दयाराम जी ल एक घरजिया दामांद मिल जथे। ओकर नाम राजिव नयन रहित। दाढ़ीधारी के नाम ले जाने जाय। मंच म झुमका अउ मंजीरा ल बजावत पंडवानी दल ल सम्हालय।
1950 मा हबीब तनवीर के 'आगरा बाजार', 'चरणदास चोर' नाटक मंच के चरचा पूरा भारत म चलत रहिस। जेन हर आघू चलके सन् 1959 म "नया थियेटर" बनके स्थापित होय रहिस। छत्तीसगढ़ के कलाकार दिल्ली के मंच - नया थियेटर म जाय बर कुलकत रहय। हबीब तनवीर छत्तीसगढ़ के अनेक कलाकार मनला अपन मंच- नया थियेटर म ले जाय बर एक दल तइयार करे रहिस जेमा श्रीमती लक्ष्मीबाई बंजारे के नाम घलो सम्मिलित रहिस। फेर ओही समय लक्ष्मीबाई ल कैंसर बिमारी हर घेर लिस। लक्ष्मीबाई के कला देश-विदेश के मंच म अपन पंडवानी विधा के छिप नइ छोड़ सकिस। लक्ष्मीबाई स्वस्थ होके अपन राज म ही पंडवानी के जयकार लगाइस। जेला देख-सुन नवा नवा महिला कलाकार के जन्म होइस।
कला संगीत के पचास बछर बाद छत्तीसगढ़ लोक कला महोत्सव के विराट मंच म गुरु परंपरा के लोक कलाकार मनके सम्मान होइस। जेमा पंडवानी विधा के गुरु के रुप म श्रीमती लक्ष्मीबाई के सम्मान करिन। लक्ष्मीबाई ये सम्मान पाके मन ल संतुष्ट करलिच। राज्य अलंकरण खातिर सरकार सम्मान नइ करिन त का होगे। जब कलाकार मन ओला पंडवानी के पुरखिन दाई कहिथे तब लक्ष्मीबाई ल अइसे लगथे जइसे ओला भारत रत्न मिलगे।
पंडवानी के पुरखिन दाई ल शत शत नमन जोहार हे।
✍️मिलन मलरिहा
नगर पंचायत मल्हार बिलासपुर छत्तीसगढ़
